অসম সাহিত্য সভা

অসম সাহিত্য সভা

অসমৰ আটাইতকৈ পুৰণি সাহিত্য আৰু সাংস্কৃতিক সংগঠন অসম সাহিত্য সভাৰ জন্ম হৈছিল ১৯১৭ খ্ৰীষ্টাব্দত। মূলতঃ ইয়াৰ আগতে কলকাতাত অধ্যয়নৰত এচাম অসমীয়া ছাত্ৰই গঢ়ি তোলা ‘অসমীয়া ভাষা উন্নতি সাধিনী সভা’ আৰু ‘অসমীয়া সাহিত্য সংগঠন’ দুটিৰ উদ্যোগতেই অসম সাহিত্য সভাৰ সূচনা হৈছিল।

বিশিষ্ট সাহিত্যিকদ্বয় পদ্মনাথ গোহাঞিবৰুৱা আৰু শৰৎচন্দ্ৰ গোস্বামীয়ে অসম সাহিত্য সভাৰ যথাক্ৰমে প্ৰতিষ্ঠাপক সভাপতি আৰু সম্পাদকৰ দায়িত্ব গ্ৰহণ কৰিছিল। সভাৰ প্ৰধান কাৰ্যালয় যোৰহাটত আৰু আন ন টা আঞ্চলিক কাৰ্যালয় গুৱাহাটীকে ধৰি অসমৰ বিভিন্ন ঠাইত অৱস্থিত। সভাৰ জিলা সাহিত্য সভাৰ সংখ্যা বত্ৰিছখন। এই জিলা সাহিত্য সভাসমূহৰ অধীনত সভাৰ এহাজাৰৰো অধিক শাখা সাহিত্য সভা আছে। ভাৰতবৰ্ষ আৰু বিদেশতো বিভিন্ন ঠাইত সভাৰ শাখা আছে। এইবোৰ হ’ল – ক’হিমা, আইজল, ছিলং, পাছিঘাট, কামেং,নতুন দিল্লী, মুম্বাই, লণ্ডন, উত্তৰ আমেৰিকা আৰু ছিংগাপুৰ।

সভাই কেন্দ্ৰীয় সমিতি আৰু জিলা সাহিত্য সভা তথা শাখা সাহিত্য সভাৰ জৰিয়তে ৫০০০ ৰো অধিক গ্ৰন্থ প্ৰকাশ কৰিছে। এইবোৰৰ ভিতৰত সভাই ইতিমধ্যে প্ৰকাশ কৰা নখন অসমীয়া বিশ্বকোষ উল্লেখযোগ্য।

অসম সাহিত্য সভাই ত্ৰিপুৰাৰ ৰাজধানী আগৰতলাত ত্ৰিপুৰা চৰকাৰৰ আৰ্থিক আৰু বস্তুনিষ্ঠ সহায়-সহযোগৰ জৰিয়তে ‘ব্ৰহ্মপুত্ৰ-গোমতী সাহিত্য সংস্কৃতি গৱেষণা কেন্দ্ৰ’ প্ৰতিষ্ঠা কৰিছে।

অসম সাহিত্য সভাই প্ৰদান কৰা একাধিক বঁটাৰ ভিতৰত অসমৰ ভাষা-সাহিত্য সংস্কৃতিৰ দুগৰাকী মনিষাৰ স্মৃতিত উৎসৰ্গীকৃত দুটি বঁটাৰ নাম উল্লেখ কৰিব পাৰি। দুবছৰীয়া এই বঁটা দুটি হ’ল ‘ভাৰতৰত্ন ড° ভূপেন হাজৰিকা আন্তৰ্জাতিক সমন্বয় বঁটা’ আৰু ‘ড° ইন্দিৰা গোস্বামী (মামনী ৰয়ছম গোস্বামী) ৰাষ্ট্ৰীয় সাহিত্য বঁটা’।

অসম সাহিত্য সভা বিভিন্ন অনুবাদ কৰ্মৰ সৈতে সক্ৰিয়ভাৱে জড়িত। পৃথিৱীৰ বিভিন্ন ভাষাৰ ধ্ৰুপদী সাহিত্য, সমকালীন আধুনিক সাহিত্য, সমালোচনা সাহিত্য আদিৰ উপৰি বিজ্ঞান-প্ৰযুক্তিবিদ্যা, সমাজ আৰু দৰ্শন শাস্ত্ৰ বিষয়ক একাধিক গ্ৰন্থ অসমীয়া ভাষালৈ অনুবাদৰ আঁচনি সভাই ৰূপায়িত কৰি আছে।

প্ৰকাশন

সবিশেষ পঢ়ক

সমাগত অনুষ্ঠানসমূহ

সবিশেষ পঢ়ক

সংবাদ বিজ্ঞপ্তি, বা-বাতৰি, অনুষ্ঠান

সবিশেষ পঢ়ক